Родри "Реал" сафига ўтиш ҳақида ўйламоқда...
«Манчестер Сити» ярим ҳимоячиси Родри фаолиятини яна Испанияда давом эттириши мумкин. Marca нашри маълумотига кўра, испаниялик футболчи Мадриднинг «Реал» клубига ўтиш вариантини жиддий ўйлаб кўрмоқда.
Манбага кўра, Родри Хосеп Гвардиола мавсум якунида «Манчестер Сити»ни тарк этиши мумкинлигини билгач, ўз келажаги ҳақида янада жиддийроқ ўйлай бошлаган. 29 ёшли хавбек учун Испанияга қайтиш асосий ва деярли ягона йўналиш сифатида қаралмоқда.
«Реал» раҳбарияти эса бу трансфер амалга ошиши мумкинлигига оптимистик руҳда қарамоқда. Мадридликлар Родрини анчадан буён кузатиб келади ва унинг майдон марказидаги етакчилик қобилиятини юқори баҳолайди.
Испаниялик ярим ҳимоячи ўйинни ўқиш, тўпни назорат қилиш, жамоа мувозанатини сақлаш ва ҳужумни бошлаш борасида Европанинг энг кучли футболчиларидан бири ҳисобланади. Айнан шу жиҳатлар «Реал» учун жуда муҳим бўлиши мумкин.
Родрининг ўзи ҳам «Мадрид» шарафини ҳимоя қилиш ҳақида ўйлаётгани айтилмоқда. Бу эса музокараларда ҳал қилувчи омилга айланиши мумкин. Чунки «Манчестер Сити» уни осонликча қўйиб юбормаслиги аниқ.
Футболчининг амалдаги шартномаси яна бир йил давом этади. Шу сабаб трансфер молиявий ва ҳуқуқий жиҳатдан мураккаб бўлиши мумкин. Аммо агар Родри кетиш истагини очиқ билдирса, вазият «Реал» фойдасига ўзгариши эҳтимолдан холи эмас.
Жорий мавсумда Родри «Манчестер Сити» сафида 33 та учрашувда майдонга тушиб, 2 та гол урди. Transfermarkt портали унинг ҳозирги бозор қийматини 65 миллион еврога баҳоламоқда.
Қисқаси, Родри атрофидаги вазият ёзги трансфер бозорининг энг қизиқ мавзуларидан бирига айланиши мумкин. Гвардиоланинг эҳтимолий кетиши «Сити»да катта силжишлар бошлаши мумкин, «Реал» эса вазиятни диққат билан кузатмоқда. Мадридга марказда ақл керак бўлса, Родри айнан шу профилдаги футболчи.
