Роберт Левандовски Барселона билан кўз ёшлар остида хайрлашди
Полшалик тажрибали ҳужумчи Роберт Левандовски мавсум якунида "Барселона"ни тарк этишга тайёргарлик кўрар экан, жамоадошларига таъсирли хайрлашув нутқини сўзлади. 37 ёшли футболчи "Камп Ноу"даги сўнгги уй учрашувида кўз ёшларини тия олмади ва Каталония клубидаги сермаҳсул фаолиятига якун ясади. Бу ҳақда Goal.com хабар беради.
"Реал Бетис"га қарши ўйин олдидан ўтказилган сўнгги машғулотда Левандовски ўз кетишидан кўра кўпроқ клуб келажагига эътибор қаратди. Тўрт йил давомида Европа майдонларида бош совринни қўлга кирита олмаган бўлса-да, ҳужумчи ҳозирги таркиб қитъа миқёсида ғалаба қозонишга қодирлигига ишонади. КаденаSEР нашрининг хабар беришича, у жамоадошларига: "Сиз Чемпионлар лигасида ғолиб чиқишга тайёрсиз", дея мурожаат қилган.
Нутқ якунлангач, жамоанинг барча аъзолари полшалик юлдуз билан қучоқлашиб хайрлашишди. Жамоа сардори Роналд Араужо ва бош мураббий Ханси Флик ҳам сўзга чиқиб, ёш футболчилар учун ўрнак бўлган тўққизинчи рақам эгасига миннатдорчилик билдиришди. "Реал Бетис" устидан қозонилган 3:1 ҳисобидаги ғалаба Левандовски учун муносиб хайрлашув саҳнасига айланди.
Ханси Флик 83-дақиқада афсонавий ҳужумчини алмаштириб, унга мухлисларнинг олқишлари остида майдонни тарк этиш имкониятини яратди. Ўйиндан сўнг Левандовски оиласи билан бирга стадионга чиқиб, мухлисларга мурожаат қилди: "Барселонага келганимда бу клубнинг нақадар буюклигини билардим, лекин сизнинг қўллаб-қувватловингиз ақл бовар қилмас бўлди. Бу ерда ўзимни уйдагидек ҳис қилдим. Исмимни айтиб ҳайқирганингизни ҳеч қачон унутмайман".
Ҳужумчининг кетиши ёш юлдузлар, хусусан Ламине Ямал учун ҳам оғир бўлди. Ёш иқтидор эгаси ижтимоий тармоқларда: "Сизни соғинамиз, афсона", дея пост қолдирди. Ханси Флик эса Левандовски "ҳақиқий профессионал ва намуна" эканини таъкидлаб, "Блауграна" сафида 192 ўйинда 119 та гол урган ҳужумчининг ўрнини босадиган футболчи топиш қийин бўлишини тан олди.
