Оқ уйдаги UFC кечасида Топурия ва Гэтжи тўқнашади
14 июндан 15 июнга ўтар кечаси UFC тарихида алоҳида ўрин эгаллаши мумкин бўлган катта турнир бўлиб ўтади. Жанг кечаси Оқ уйда ташкил этилиши режалаштирилгани унинг аҳамиятини янада оширмоқда.
Оқшомнинг асосий жанги енгил вазн тоифасида амалдаги чемпион Илия Топурия ва вақтинчалик камар соҳиби Жастин Гэтжи ўртасида кечади. Бу тўқнашув мухлислар томонидан катта қизиқиш билан кутилмоқда. Чунки Топурия ўз чемпионлик мақомини ҳимоя қилишга интилса, Гэтжи яна бир бор ўзининг кучли зарбалари ва жанговор характери билан камар учун курашади.
Турнирнинг иккинчи марказий жанги ҳам интригага бой. Бразилиялик Алекс Перейра бу сафар оғир вазн тоифасида октагонга кўтарилади. “Поатан” вақтинчалик чемпионлик камари учун франциялик Сирил Ган билан куч синашади.
Агар Перейра ушбу баҳсда ғалаба қозонса, у UFC тарихида уч вазн тоифасида камарга эга чиққан жангчига айланади. Бу эса унинг карьерасидаги энг йирик ютуқлардан бири бўлиши мумкин.
Бундан ташқари, ушбу жанг кечасида Шон О’Мэлли, Майкл Чендлер, Деррик Льюис ва UFC’нинг бошқа таниқли жангчилари ҳам октагонга чиқиши режалаштирилган. Шу боис турнир мухлислар учун йилнинг энг шов-шувли воқеаларидан бирига айланиши кутилмоқда.
Қисқаси, Оқ уйдаги UFC кечаси оддий турнир эмас, тарихий шоу бўлишга яқин. Топурия — Гэтжи, Перейра — Ган, яна О’Мэлли ва Чендлер ҳам бор. Бу кардда попкорн эмас, асаб керак бўлади.
