Реал Мадрид президентлиги учун кураш: Риқуелме Эрлинг Холандни вада қилмоқда
Реал Мадрид президенти Флорентино Перез бўлажак сайловларда жиддий рақобатга дуч келиши кутилмоқда. Кох энергетика компанияси раҳбари, тадбиркор Энриқуе Риқуелме клуб сайлов қўмитасига расмий хат йўллаб, ўз номзодини қўйишини тасдиқлади. Риқуелме амалдаги президентга қарши чиқадиган биринчи расмий номзод бўлиши мумкин. Бу ҳақда Goal.com хабар беради.
Номзодликни расмийлаштириш учун даъвогарлар камида 20 йиллик клуб аъзолигига эга бўлиши ва йиллик бюджетнинг 15 фоизига тенг бўлган 187 миллион евролик кафолат маблағини тақдим этиши лозим. Агар барча талаблар бажарилса, клуб аъзолари ўртасида овоз бериш жараёни ташкил этилади. Ҳозирда номзодларни рўйхатга олиш муддати 23-майга қадар давом этади.
Эл Конфиденциал нашрининг хабар беришича, Риқуелме сайловчиларни ўзига оғдириш учун иккита йирик трансфер режасини тайёрлаб қўйган. Унинг биринчи мақсади Манчестер Сити ҳужумчиси Эрлинг Холандни Мадридга олиб келишдир. Маълумотларга кўра, тадбиркор аллақачон норвегиялик футболчининг вакиллари билан алоқага чиққан.
Риқуелменинг иккинчи асосий режаси мураббийлик ўриндиғи билан боғлиқ. У ҳозирда Ред Булл тизимида фаолият юритаётган Жюрген Клоппни жамоага таклиф қилмоқчи. Бу режа яқин вақтгача Реал Мадрид бошқарувига қайтиши кутилаётган Хосе Моуриньо вариантини сўроқ остида қолдириши мумкин.
Флорентино Перез эса матбуот анжуманида ўзига нисбатан "туҳмат кампанияси" уюштирилаётганини таъкидлади. Реал Мадрид 2009/10-йилги мавсумдан бери илк бор кетма-кет икки йилни совринсиз якунлади. Бу эса клуб ичидаги сиёсий курашнинг янада кескинлашишига сабаб бўлмоқда.
