Хосе Моуриньо Реал Мадридга қимматга тушиши кутилмоқда
ОАВда тарқалган сўнгги хабарларга кўра, Хосе Моуриньо яна Реал Мадрид бошқарувини қўлга олишга яқин турибди. Бироқ, ушбу тайинлов клуб учун кутилганидан анча қимматга тушиши мумкин. Bild нашри ва Португалиянинг РТП телеканали маълумотларига кўра, мураббийнинг Benfica билан шартномасидаги товон пули миқдори бўйича муддат ўтиб кетган. Бу ҳақда Goal.com хабар беради.
Дастлаб Реал Мадрид 63 ёшли мутахассисни 7 миллион евро эвазига ўз сафига қўшиб олиши мумкин эди, аммо сешанба кунги муддат ички низолар сабабли ўтказиб юборилди. Эндиликда "Қироллик клуби" Хосе Моуриньо учун 14 миллион евро тўлашига тўғри келади. Мураббийнинг Лиссабон клуби билан амалдаги шартномаси 2027-йилгача имзоланган.
Клуб президенти Флорентино Перез матбуот анжуманида ОАВни танқид қилиб, президентлик сайловларини ўтказишга чақирди. Айни дамда унга Энрике Риқуелме рақиблик қилмоқда. Шу сабабли, Хосе Моуриньо билан келишув сайлов натижалари маълум бўлгунга қадар тўхтатиб қўйилган. Шунга қарамай, Benfica раҳбарияти "Те Специал Оне"нинг Мадридга қайтишига ишонмоқда.
Моуриньо кетган тақдирда, Benfica бошқарувини Фулхэм устози Марко Силва эгаллаши кутилмоқда. Хосе Моуриньо Португалия клубидаги фаолияти давомида мағлубиятсиз серия қайд этган бўлса-да, соврин юта олмади. Чемпионлар лигаси плей-офф босқичида эса айнан Реал Мадрид тўсиғидан ўта олмаган эди.
Реал Мадрид учун мавсум омадсиз бошланди. Хаби Алонсо жамоани тарк этгач, унинг ўрнига келган Альваро Арбелоа ҳам кутилган натижаларни кўрсата олмади. Барселона билан Суперкубок финалидаги мағлубият ва ички низолар клубни янги мураббий излашга мажбур қилмоқда.
