TikTok Буюк Британияда рекламасиз обуна режасини ишга туширди

TikTok Буюк Британия фойдаланувчилари учун ойлик тўлови 3,99 фунт стерлинг (тахминан 5,44 доллар) бўлган рекламасиз обуна режасини тақдим этди. Ушбу янги хизмат яқин ойлар ичида босқичма-босқич жорий этилади ва ундан фақат 18 ёшдан ошган фойдаланувчилар фойдаланишлари мумкин. Бу ҳақда Techcrunch.com хабар беради.

Обуна бўлган фойдаланувчилар платформада ҳеч қандай реклама кўрмайдилар. Шунингдек, уларнинг шахсий маълумотлари реклама мақсадларида қайта ишланмайди. Мазкур қадам Буюк Британиянинг ГДПР (Умумий маълумотларни ҳимоя қилиш регламенти) талабларига мослашиш мақсадида амалга оширилган бўлиши мумкин, чунки қонун компанияларга фойдаланувчи розилигисиз реклама учун маълумот йиғишни тақиқлайди.

TikTok'нинг Буюк Британиядаги бошқарувчи директори Крис Боге ушбу янгиликни шарҳлар экан, платформа ҳамжамият учун танлов имкониятини кенгайтираётганини таъкидлади. Унинг сўзларига кўра, рекламасиз режа фойдаланувчиларга ўз тажрибасини назорат қилиш имконини беради, шу билан бирга бизнес учун реклама имкониятлари ўз кучида қолади.

TikTok ушбу обуна моделини дастлаб 2023-йилда синовдан ўтказишни бошлаган эди. Ҳозирча ижтимоий тармоқ гиганти ушбу хизматни АҚШ ёки бошқа мамлакатларда ҳам жорий этишни режалаштираётгани ҳақида аниқ маълумот йўқ.