Ваймо йўл қурилиши ҳудудларидаги муаммолар сабабли магистрал йўллардаги ҳаракатни тўхтатди
Ваймо компанияси Сан-Франциско, Лос-Анжелес, Феникс ва Маями шаҳарларидаги магистрал йўлларда роботакси хизматини вақтинча тўхтатди. Компания TechCrunch нашрига берган маълумотида, бу қарор йўл қурилиши ҳудудларида ҳаракатланиш самарадорлигини ошириш мақсадида қабул қилинганини тасдиқлади. Ҳозирда мутахассислар дастурий таъминотни янгилаш устида ишламоқда, бироқ роботаксилар шаҳарларнинг ички кўчаларида одатдаги режимда хизмат кўрсатишда давом этмоқда. Бу ҳақда Techcrunch.com хабар беради.
Магистрал йўллардаги фаолиятнинг тўхтатилиши Ваймо учун кутилмаган тўсиқ бўлди. Аввалроқ компания Атланта ва Сан-Антонио шаҳарларида ҳам кучли сув тошқинлари сабабли ишларни тўхтатишга мажбур бўлган эди. Ўтган ҳафтада Сан-Антонио шаҳридаги сув тошқини зоналаридан қочишга ёрдам берувчи дастурий таъминотни қайта чақириб олиш эълон қилинган эди. Атлантада эса камида битта роботакси йўлда қолиб кетгани аниқланганидан сўнг, у ерда ҳам хизматлар тўхтатилди.
Ушбу техник узилишлар Ваймо ўз фаолиятини глобал миқёсда кенгайтиришни режалаштираётган бир вақтда юз бермоқда. Компания 2026-йил охирига келиб ҳафтасига бир миллион пуллик сафарни амалга оширишни мақсад қилган. Шунингдек, Ваймо ҳозирда Zeekr томонидан ишлаб чиқарилган Ожаи деб номланган янги авлод роботаксиларини синовдан ўтказмоқда ва яқин ойларда ушбу транспорт воситаларида хизмат кўрсатишни бошлашни режалаштирмоқда.
Юқори тезликдаги магистрал йўллар Ваймо учун стратегик аҳамиятга эга, чунки бу йўллар аэропортларга бориш вақтини сезиларли даражада қисқартиради. Масалан, Сан-Франциско ярим оролида магистралдан фойдаланиш бир соатлик йўлни бир неча ўн дақиқага қисқартирган эди. Компания аниқ бир ҳодисани сабаб қилиб кўрсатмаган бўлса-да, ижтимоий тармоқларда Ваймо автомобиллари қурилиш конусларини уриб кетгани ва полиция томонидан тўхтатилгани ҳақидаги видеолар тарқалган.
