Олимлар коррупцияни башорат қилувчи нейротармоқни яратди

Испаниянинг Вальядолид университети ва Россиянинг Олий иқтисодиёт мактаби олимлари Испания иқтисодиёт вазирлиги кўмагида коррупция ҳолатлари эҳтимолини башорат қилувчи нейротармоқ яратди. Бу ҳақда «Известия»га таяниб «Дарё» хабар берди.

Олимлар ҳудуддаги макроиқтисодий ва сиёсий кўрсаткичлар асосида коррупцияни башорат қилувчи моделни яратди. Модель ҳудуднинг хусусиятларидан келиб чиқиб уч йилгача бўлган вақт оралиғи учун коррупция юзага келишини башорат қилишга имкон беради.

Тадқиқот порахўрликнинг тарқалишига сабаб бўлувчи омиллар сифатида мол-мулк солиғининг ўзгариши, иқтисодий ўсиш, турар жойнинг қимматлашуви, депозит муассасалари ва номолиявий фирмалар сонининг кўпайиши, шунингдек, ҳукумат тепасида битта сиёсий партиянинг узоқ вақт давомида туришини кўрсатган.