Pavel Durov 41 yoshga to‘ldi

Bugun Pavel Durovning tavallud kuni. U nafaqat zamonaviy axborot texnologiyalari sohasida, balki so‘z erkinligi va shaxsiy daxlsizlik yo‘lidagi sa’y-harakatlari bilan ham tanilgan shaxs hisoblanadi.

2006-yilda u “VKontakte” ijtimoiy tarmog‘ini ta’sis etgan bo‘lib, bu tarmoq qisqa vaqt ichida Rossiya va MDHdagi eng ommaviy platformalardan biriga aylandi.

2013-yilda Pavel akasi Nikolay Durov bilan birgalikda Telegram messenjerini yaratdi. Bu ilova maxfiylik va xavfsizlikni ta’minlashdagi innovatsion yondashuvi bilan dunyo miqyosida shon-shuhrat qozondi. Bugungi kunda Telegram’ning 1 milliarddan ortiq faol foydalanuvchisi bor.

Forbes ma’lumotlariga ko‘ra, Pavel Durovning boyligi 17,1 milliard dollarga teng — bu uni dunyodagi eng boy texnologik tadbirkorlardan biri sifatida ko‘rsatadi.

U hukumat bosimiga qaramay, foydalanuvchilarning shaxsiy ma’lumotlarini berishdan bosh tortgan, va “biznes odamlarga xizmat qilishi kerak, nazorat manfaatlariga emas”, degan fikri bilan millionlab insonlarning hurmatini qozongan.

Xalqaro e’tirof:

• “30 yoshgacha bo‘lgan eng istiqbolli yetakchi” deb tan olingan

• Young Global Leaders dasturi ishtirokchisi

• Fortune “40 Under 40” ro‘yxatiga kiritilgan

Pavel Durovni tavallud kuni bilan muborakbod etamiz!