NVIDIA raqibi: Xitoyda yangi T-Head Zhenwu M890 protsessori taqdim etildi
Alibaba kompaniyasi sunʼiy intellekt uchun moʻljallangan yangi Zhenwu M890 chipini namoyish etdi. Xitoy texnologiya giganti AQSHning eksport cheklovlari kuchayib borayotgan bir paytda, NVIDIA chiplariga munosib mahalliy muqobil yaratish borasidagi harakatlarini jadallashtirmoqda. Bu haqda Ixbt.com xabar beradi.
Alibaba tarkibidagi yarimoʻtkazgichlar ishlab chiqaruvchi T-Head boʻlinmasi tomonidan yaratilgan ushbu chip oʻzidan oldingi Zhenwu 810E modeliga qaraganda uch baravar yuqori unumdorlikni taʼminlaydi. U maxsus sunʼiy intellekt "agentlari" — inson aralashuvisiz murakkab va koʻp bosqichli vazifalarni bajarishga qodir dasturiy tizimlar uchun ishlab chiqilgan.
Kompaniya bayonotiga koʻra, yangi protsessor katta hajmdagi xotira va kommunikatsiya yuklamalarini qayta ishlash uchun juda mos keladi. Bu, ayniqsa, modellarning uzoq muddatli kontekstni saqlab qolishi va real vaqt rejimida harakatlarni muvofiqlashtirishi kerak boʻlgan agentlik tizimlarida muhim ahamiyatga ega.
Shuningdek, Alibaba chiplarni rivojlantirishning koʻp yillik rejasini ham eʼlon qildi. Unga koʻra, M890 modelidan soʻng 2027-yilning uchinchi choragida V900, 2028-yilda esa J900 chiplari chiqariladi. Kutilishicha, V900 modeli M890 ga nisbatan unumdorlikni yana uch baravarga oshiradi.
