Lukashenko: “Oʻzbeklarday savdo qilishni bilganimizda, hozirgidan ikki marta boyroq boʻlardik”

Belarus Respublikasi Prezidenti Aleksandr Lukashenko mamlakatimizda rasmiy tashrif bilan boʻlib turibdi.

Mazkur tashrif tafsilotlarini yoritib borayotgan Belarus Telegraf agentligi – “BelTA”ning xabar berishicha, ikki mamlakat rahbarlarining tor doiradagi muzokarasida Aleksandr Lukashenko Oʻzbekiston iqtisodiyoti va davlatlararo munosabatlari taraqqiy etayotganidan belaruslar mamnun ekanini aytib oʻtgan, deb yozmoqda “Xalq soʻzi” nashri.

Shuningdek, u yurtimizda istiqomat qilayotgan belarus diasporasini har tomonlama qoʻllab-quvvatlayotgani uchun Prezidentimiz Shavkat Mirziyoyevga samimiy minnatdorlik izhor qilgan.

“Men bu yerga Sizning Belarus va belaruslarga munosabatingiz uchun minnatdorlik bildirgani keldim. Biz, avvalo, mehnatsevarligimiz bilan bir-biriga juda oʻxshash xalqmiz. Agar ishlab chiqarayotgan mahsulotlarimizni oʻzbeklar kabi savdo qilishni bilganimizda, hozirgidan ikki karra boyroq boʻlardik. Oʻylaymanki, sizlar bizga oʻz tajribangizni oʻrgatasiz,” – degan Belarus rahbari.

Belarus Respublikasi Prezidenti Aleksandr Lukashenkoning mamlakatimizga rasmiy tashrifi davom etmoqda.