Saudiya Superkubogi. «Al-Ahli» penaltilarda zafar quchdi, Ronaldu yana sovrinsiz qoldi
Saudiya Arabistoni Superkubogi finali katta dramatizm va keskin to‘qnashuvlar bilan yodda qoldi. «Al-Ahli» va «An-Nasr» o‘rtasidagi bellashuv muxlislarga tom ma’noda his-hayajonli onlar ulashdi.
Asosiy 90 daqiqa 2:2 hisobidagi durang bilan yakunlandi. Qo‘shimcha daqiqalarda ham g‘olib aniqlanmagani bois, barcha narsa penaltilar seriyasiga qoldi. Ushbu sinovda esa «Al-Ahli» ancha ishonchli harakat qilib, 5:3 hisobida raqibni taslim etdi va Superkubokni qo‘lga kiritdi.
Bellashuv gollarga boy bo‘ldi. Dastlab 41-daqiqada Krishtianu Ronaldu penaltidan aniq zarba yo‘llab hisobni ochdi. Birinchi bo‘limning qo‘shib berilgan vaqtida Frank Kessi javob qaytarib, natijani tenglashtirdi.
Ikkinchi bo‘limning 82-daqiqasida «Inter»ning sobiq yarim himoyachisi Marselo Brozovich o‘z jamoasini oldinga olib chiqdi. Biroq oradan ko‘p o‘tmay, 89-daqiqada Ibanes gol kiritib, yana vaziyatni muvozanatga keltirdi.
Shu tariqa, asosiy vaqt dramatik durang bilan yakunlanib, hal qiluvchi lahzalar penaltilarda belgilandi. U yerda esa «Al-Ahli»ning qo‘li baland keldi.
Ma’lumot uchun, ushbu bellashuvdagi goli orqali Krishtianu Ronaldu tarixiy ko‘rsatkichga erishdi. U 4 xil klub tarkibida 100 tadan ortiq gol urgan dunyodagi yagona futbolchi sifatida qayd etildi.
Bu final nafaqat «Al-Ahli»ning g‘alabasi, balki Ronalduning yana bir sovrinsiz qolgan kechasi sifatida ham futbol tarixida qoladi.
