Fayzullayev va Shomurodov “Bashakshehir”ga g‘alabani olib bergan kecha (video)
Turkiya Superligasining 14-turidan o‘rin olgan “Qosimposho” – “Bashakshehir” bahsi ko‘pchilik kutgandan ham jozibali o‘tdi. Ustoz Nuri Shahin boshqargan mehmon jamoa raqib maydonida 3:1 hisobida ishonchli tarzda zafar quchdi va bu kechada asosiy rolni aynan o‘zbekistonlik futbolchilar bajardi.
Uchrashuvni faol va hujumkor boshlagan “Bashakshehir” 26-daqiqada hisobni ochdi — Abbosbek Fayzullayev jarima zarbasini mohirona ijro etib raqib darvozasiga to‘pni yo‘lladi. Abbosning harakatidan jamoa ruhi sezilarli ko‘tarildi va oradan ko‘p vaqt o‘tmay, Amine Harit birinchi taymning oxirida hisobni 2:0 qilib qo‘ydi.
Ikkinchi bo‘limda “Qosimposho” jonlanib, Arous orqali bitta gol qaytardi. Lekin bu gol mehmonlarning o‘yinini yanada kuchaytirishiga sabab bo‘ldi. Uchrashuvning qo‘shimcha daqiqalarida esa o‘zbekistonlik yana bir yulduz sahnaga chiqdi — Eldor Shomurodov. U jarima maydoni tashqarisidagi vaziyatdan ustalik bilan foydalanib, darvozabonni dog‘da qoldirdi va ushbu goli bilan uchrashuvga nuqta qo‘ydi.
Shu tariqa, O‘zbekiston milliy jamoasi sardori Eldorning Superligadagi gollari soni 10 taga yetdi — u Turkiyada ham haqiqiy yetakchiga aylanib bormoqda. Abbosbek esa o‘yindan o‘yinga o‘sishda davom etyapti, jamoa uchun hal qiluvchi vaziyatlar yaratmoqda.
Ushbu muhim g‘alaba “Bashakshehir”ga 16 ochko to‘plab, turnir jadvalida 9-pog‘onaga ko‘tarilish imkonini berdi. “Qosimposho” esa 13 ochko bilan 14-o‘rinda qolib ketdi.
Turkiya Superligasi. 14-tur
Qosimposho – Bashakshexir 1:3
Gollar: Arous 79 – Abbosbek Fayzullayev 26, Harit 45+4, Eldor Shomurodov 90+3.
Bashakshexir tarkibi:
Shengezer, Bulut, Duarte, Opoku, Operi, Fayzullayev (Gureler, 78), Kemen (Krespo, 78), Harit (Da Kosta, 72), Zelke, Shomurodov.
