Djikiyaga klubini almashtirish haqida o'ylashga to'g'ri kelmoqda

Rossiyalik himoyachi Georgiy Djikiya kelajagi borasida uning vakili Malik Arutyunov izoh berdi. Bu haqda euro-football.ru xabar beradi.

Agentning aytishicha, futbolchi Turkiyadagi hayot va sharoitlardan umuman olganda mamnun, biroq maosh kechikayotgani uni norozi qilgan. Shu sabab Djikiya Rossiya Premyer-ligasi klublaridan tushishi mumkin bo'lgan variantlarni ko'rib chiqmoqda.

Ma'lumotlarga ko'ra, Antalyaspor futbolchisiga to'lovlar noyabr oyidan beri kechikmoqda. Shunga qaramay, u Turkiyada boshqa jihatlardan muammo sezmayapti.

32 yoshli himoyachi Antalyaspor safiga o'tgan yozda qo'shilgan va klub bilan ikki yillik shartnoma imzolagan.

Joriy mavsum Turkiya Superligasida Djikiya 12 uchrashuvda maydonga tushdi, 2 ta gol urdi hamda 3 ta sariq kartochka oldi.