Iturralde Valverde va Dal bilan epizodni qizil deb baholadi
FIFA toifasidagi sobiq hakam Iturralde Gonsales «Benfika»ning UEFAga yo‘llagan hakamlik borasidagi e’tiroziga munosabat bildirdi. Chempionlar ligasi pley-offidagi «Real»ga qarshi o‘yinda 82-daqiqada Federiko Valverde Samuel Dalga zarba bergan vaziyatda hakam madridlik yarimhimoyachini maydondan chetlatmadi. Bu haqda euro-football.ru xabar beradi.
Iturraldening ta’kidlashicha, bu epizod qizil kartochkaga tortardi. «Bu qizil kartochka. U hech qanday sababsiz zarba berdi. Valverdeni maydondan haydash kerak edi, hatto raqibiga to‘liq tekkizmagan bo‘lsa ham», — deya sobiq arbitrning so‘zlarini AS nashri keltirdi.
«Benfika» — «Real» uchrashuvi 0:1 hisobida yakunlandi, yagona golga Vinisius Junior mualliflik qildi. Javob bahsi 24-fevral kuni bo‘lib o‘tadi.
