Dimarko Mxitaryan uchrashuv qahramoni bo'lishi kerakligini aytdi

Milanning “Inter” jamoasi chap qanot himoyachisi Federiko Dimarko A Seriyadagi “Lechche”ga qarshi 2:0 hisobidagi g‘alabadan so‘ng fikrlari bilan o‘rtoqlashdi. Bu haqda euro-football.ru xabar beradi.

“Neradzurrilar” hisobni faqat 75-daqiqada Genrix Mxitaryan kiritgan gol evaziga ochdi. 82-daqiqada esa Dimarko uzatmasidan keyin Manuel Akandji gol urib, uchrashuvdagi yakuniy natijani belgilab qo‘ydi. O‘yinning eng yaxshi futbolchisi sifatida aynan Dimarko e’tirof etildi.

“Menimcha, bu sovringa Mxitaryan ko‘proq loyiq edi — u juda yaxshi o‘yin ko‘rsatdi. Mukofotni bolalarimga beraman, ular bu sovg‘alarni yaxshi ko‘rishadi va men uchun saqlab qo‘yishadi. Jamoaning natijasi har doim shaxsiy sovrinlardan ustun”, — dedi Dimarko.

U shuningdek, Mxitaryanning goli jamoaga yengillik berganini ta’kidladi: “Biz juda qiyin bo‘lishini bilardik, chunki ‘Lechche’ tartibli va yaxshi tashkil etilgan jamoa”, — deya DAZN’ga bergan intervyusida qo‘shimcha qildi.

Bu g‘alabadan keyin “Inter” ikkinchi o‘rindagi “Milan”dan 10 ochkoga uzoqlashdi.