Renn bir taymda Oserni yirik hisobda mag'lub etdi

Fransiya Liga 1ning 23-turida "Oser" o'z maydonida "Renn"ni qabul qildi va uchrashuv mezbonlar uchun omadsiz yakunlandi. Bu haqda euro-football.ru xabar beradi.

O'yin taqdiri birinchi bo'lim o'rtalaridagi qisqa vaqt oralig'ida hal bo'ldi. 20-daqiqada Mahdi Kamara yiqilgan holatda ajoyib zarba bilan hisobni ochdi, oradan ikki daqiqa o'tib esa Sebastyan Shimyanskiyning uzatmasidan keyin Esteban Lepol farqni ikkitaga yetkazdi.

Birinchi taym yakunida Kamara uzoq masofadan yo'llagan aniq zarbasi bilan dubl qayd etib, tanaffusgacha hisobni 0:3 ko'rinishiga olib keldi.

Ushbu g'alabadan so'ng "Renn" turnir jadvalida sof beshinchi pog'onaga ko'tarildi. "Oser" esa quyi qismda qolib, oxiridan uchinchi o'rinni egallab turibdi.