Arsenal muxlislari chempionlik kubogini koʻrish uchun styuard qiyofasiga kirdi
Angliya Premer-ligasining soʻnggi turida "Kristal Pelas"ga qarshi kechgan bahsda gʻalati voqea yuz berdi. Arsenal jamoasining ikki nafar muxlisi Selxerst Park stadioniga noqonuniy kirishga urinayotganda qoʻlga olindi. Ular oʻyin yakunidagi tarixiy taqdirlash marosimini oʻz koʻzlari bilan koʻrish uchun styuardlar kiyimini kiyib olishgan. Bu haqda Goal.com xabar beradi.
35 va 37 yoshli ushbu shaxslar maxsus nur qaytaruvchi nimchalardan foydalanib, stadion xodimlari orasiga suqilib kirishga harakat qilishgan. Biroq turniketlar oldida haqiqiy styuardlar ularning shubhali xatti-harakatlarini sezib qolishgan va darhol politsiyaga xabar berishgan. Metropolitan politsiyasi firibgarlikda gumon qilingan ushbu shaxslar hibsga olinganini tasdiqladi.
Arsenal ushbu uchrashuvda 2:1 hisobida gʻalaba qozonib, chempionlik kubogini boshi uzra baland koʻtardi. Muxlislarning bunday tavakkalga qoʻl urishiga sabab — mehmondagi oʻyin uchun chiptalar yetishmovchiligi va klubning uzoq kutilgan gʻalabasini bevosita maydonda nishonlash istagi boʻlgan.
Shu bilan birga, Londonning shimoliy qismida, yaʼni "Emireyts" stadioni atrofida ham tartibsizliklar kuzatildi. Minglab muxlislar chempionlikni nishonlash uchun koʻchalarga chiqishgan. Politsiya maʼlumotlariga koʻra, hududda jamoat tartibini buzgan, mast holatda boʻlgan va xodimlarga qarshilik koʻrsatgan 17 kishi hibsga olingan.
"Kristal Pelas" rahbariyati ushbu hodisadan soʻng xavfsizlik choralarini kuchaytirishini va chiptalarni noqonuniy tarqatgan yoki firibgarlik ishlatgan muxlislarga nisbatan qatʼiy choralar koʻrilishini maʼlum qildi. Bunday muxlislar kelgusi mavsum uchun abonement sotib olish huquqidan butunlay mahrum etilishi mumkin.
