Piers Morgan Arsenal chempionlik bayramida maydonga tushgani uchun tanqid qilindi
Taniqli teleboshlovchi Piers Morgan Arsenal jamoasining Angliya Premer-ligasidagi tarixiy g‘alabasidan so‘ng maydonga tushgani uchun bildirilgan tanqidlarga hazil bilan javob qaytardi. Ashaddiy muxlis va uning uch o‘g‘li Kristal Pelasga qarshi o‘yindan keyingi taqdirlash marosimida jamoa bilan birga maydonda ko‘rinish bergani futbol ishqibozlarining e’tiroziga sabab bo‘ldi. Bu haqda Goal.com xabar beradi.
Arsenal jamoasi 22 yillik tanaffusdan so‘ng chempionlikni qo‘lga kiritganidan so‘ng, Morgan va uning o‘g‘illari Selhurst Park stadionida Mikel Arteta hamda asosiy tarkib futbolchilari bilan suratga tushishdi. Ijtimoiy tarmoq foydalanuvchilari qanday qilib oddiy muxlislar stadion protokollarini chetlab o‘tib, maydonning eksklyuziv qismiga kirganiga qiziqish bildirishdi. Ayniqsa, avvalroq Mikel Arteta iste’fosini talab qilgan Morganning jamoa bilan bayram qilishi ko‘pchilikka yoqmadi.
Tanqidlarga javoban Morgan X (sobiq Twitter) tarmog‘ida shunday yozdi: "Balki bunga sabab 55 yildan beri qo‘llab-quvvatlayotgan klubim uchun bu kun muhim bo‘lishini sezib, mart oyi boshida 4 ta chipta sotib olganimdir. Artetaga kelsak, u meni va ko‘pchilikni xato qilganimizni isbotladi, bundan faqat xursandman".
Boshlovchi maydonga qanday kirgani haqidagi savollarga oydinlik kiritib, chiptalarni to‘liq narxda (har birini 750 funt + QQS) sotib olganini va Palace’s 2010 Club VIP-lojasida bo‘lganini ma’lum qildi. Uning so‘zlariga ko‘ra, o‘yindan so‘ng ularni direktorlar xonasiga taklif qilishgan va kubokni topshirish marosimini maydon chetida kuzatish imkoniyatini berishgan.
Shuningdek, Morgan yarim himoyachi Declan Rice bilan bog‘liq vaziyatga ham to‘xtaldi. Futbolchi o‘z medalini boshlovchining bo‘yniga taqib qo‘ygani tasvirlangan surat haqida gapirar ekan, Morgan: "Declan yugurib kelib medalini bo‘ynimga taqishi uchun pul to‘lamaganman, lekin u shunday qilganidan juda xursandman", — deya qo‘shimcha qildi.
