Andrey Fyodorov: “Tezkor oʻtkazilgan goldan keyin oʻzimizni yoʻqotib qoʻymaganimiz yaxshi boʻldi”

“Lokomotiv” - AGMK (2:1) uchrashuvidan keyingi matbuot anjumanining ikkinchi qismida mezbonlar ustozi Andrey Fyodorov ishtirok etdi.
“Bu mavsum AGMK bilan ikkinchi marta toʻqnash keldik. Raqibning barcha oʻyinlarini koʻrdik, oʻrganib chiqdik. Toʻgʻri kutilmaganda tezkor gol oʻtkazib yubordik. Ammo yaxshiki shogirdlarim shoshilmasdan oʻz oʻyinimizni davom ettirishdi va bu samara keltirdi.

Tanaffusda tashabbusni biroz raqibga topshirdik. Bu hafta oʻrtasida Saudiya Arabistonida va bugun ham issiqda oʻynadik. Shu bois biroz kuch saqlab qolishga harakat qildik. Gʻalabali hisobni saqlab qolishga erishdik”, - deydi Andrey Fyodorov.

Manba: championat.asia