WBA yangi reytingi TOP-15ligida yana bir o‘zbekistonlik bokschi paydo bo‘ldi

Butunjahon boks assotsiatsiyasi WBA professional bokschilarning 2019 yilning so‘nggi dekabr oyi uchun reytingini e’lon qildi. Bu haqda GoSport.uz internet-nashri xabar bermoqda.

Unga ko‘ra, super o‘rta (-76,2 kg) vazn toifasida WBA Continental Americas chempionlik kamari sohibi Bektemir Meliqo‘ziyev (4-0, 3 KO) ilk marta TOP-15talik reytingdan o‘rin egalladi. Bektemir o‘z vazn toifasida aynan 15-o‘rinda qayd qilingan.

Ikkinchi yarim yengil (-55,34 kg) vazn toifasida ringga chiqayotgan Murodjon Ahmadaliyev (7-0, 6 KO) o‘tgan oydagi kabi reytingda peshqadamlik qilishda davom etmoqda. Super yarim o‘rta (-69,85 kg) vazn toifasida ringga chiqayotgan Isroil Madrimov (4-0, 4KO) esa 4-o‘rinni, super yengil (63,5 kg) vazn toifasi vakili Shohjahon Ergashev (17-0, 15 KO) esa oltinchi o‘rinni saqlab qolgan.

Super yengil vazn toifasining boshqa bir vakili Shahram G‘iyosov (9-0, 7 KO) esa o‘tgan oydagi ko‘rsatkichidan bir pog‘ona pastlab sakkizinchi pog‘onani egallab turibdi.

Reytingda o‘zbekistonlik boshqa sportchilar o‘rin olmagan.