Viktor Kumikov: "Raqib feyr-pleyga rioya qilmadi"

Superliganing 20-turidan o‘rin olgan \"Qo‘qon-1912\" – \"Andijon\" (1:1) uchrashuvidan keyin mehmonlar ustozi Viktor Kumikov o‘z fikrlarini bildirdi.

- O‘yin haqida
- Rostini aytsam, kayfiyatim yo‘q. Ikki jamoa ham kurash olib borishdi. Afsuski, ikkinchi o‘yindirki, so‘nggi soniyalarda gol o‘tkazib yubordik. Penalti qanday yuzaga kelganini bilmayman, palapartishlik yuzaga keldi. U holatda hamma qoidani buzdi. 1:0 vaqtida albatta, narigi tomonga penalti berishyapti. Bizga esa bunday emas. Emotsiyaga berilib gapirayotgandirman, bir oz xafaman.

- Jamoangiz darvozabonining o‘yinidan qoniqmadingizmi? E’tiroz bildirdingiz...
- To‘pni yaqinimizdagi hududga emas, uzoqroqqa tepish kerak, shuning uchun e’tiroz bildirdim. Raqib feyr-pleyga rioya qilmadi. Futbolchilarimiz to‘pni qaytarishlariga ishonishgandi.

- Sizningcha, \"Paxtakor\" Qozog‘iston premer-ligasida o‘ynaganida, taxminan qaysi o‘rinni band etgan bo‘lardi?
- Yetakchilar qatorida yurgan bo‘lardi. \"Qayrat\", \"Astana\" kabi jamoalar bilan raqobatlashardi.

- \"Andijon\" futbolchilari vaqtni ko‘p cho‘zishdi. Bu sizning topshirig‘ingizmidi?
- Qaysi murabbiy \"gol urib, vaqtni cho‘zinglar\", deydi? Aksincha, men ularga qarshi hujumdan unumli foydalanishni buyurdim.

- Qaysi jamoalar Superligadan tushib ketadi deb o‘ylaysiz?
- Asosiysi, biz tushib ketmaylik. Meni shu qiziqtiradi.

- \"Andijon\" o‘tgan o‘yinga nisbatan kombinatsion o‘yin ko‘rsatdi...
- Qancha ochko to‘plaganimizni qarang. Kombinatsion futbol namoyish qila olamiz, ammo bizga ochko zarur. Superligada jon saqlab qolish uchun kurashyapmiz.