Shveysariyada 3D printerda chop etiladigan dunyodagi eng baland minora qurilmoqda

^{Foto: dbt.arch.ethz.ch}
Shveysariyada 3D texnologiyasi asosida Tor Alva minorasining qurilish ishlari boshlandi. Bu haqda New Atlas xabar bermoqda.
Balandligi 30 metrlik ushbu inshoot 3D printerdan chop etiladigan dunyodagi eng baland minora bo‘ladi.

^{Foto: dbt.arch.ethz.ch}
Bino Tor Alva (Oq minora) deb nomlanib, loyiha ustida Nova Fundaziun Origen madaniy muassasasi bilan hamkorlikda ishlanmoqda. Majmua qismlarga bo‘lib chop etiladi, so‘ngra tog‘li hududda joylashgan Myulens qishlog‘idagi qurilish maydonchasiga olib borilib, yig‘iladi.

^{Foto: dbt.arch.ethz.ch}
Barokko uslubidan ilhomlanib quriladigan binoning asosi minglab 3D bosma ustunlardan iborat bo‘ladi. Muhandislar turli noqulay ob-havodan himoya qilish maqsadida yengil, yechiladigan membrana o‘rnatishni ham ko‘zda tutishgan.

^{Foto: dbt.arch.ethz.ch}
Binoning eng yuqori qavatida ixcham konsert va teatr tomoshalari uchun zal joylashadi. Qurilish ishlari iyun oyida tugashi rejalashtirilgan.