Vensan Kompani Manchester Siti himoyachisini Bavariyaga chorlamoqda
Myunxenning Bavariya klubi transfer bozorida kutilmagan yurishni amalga oshirishi mumkin. Britaniyaning Daily Mail nashri xabariga koʻra, nemis grandi Manchester Siti himoyachisi John Stones nomzodini koʻrib chiqmoqda. 31 yoshli markaziy himoyachining shartnomasi iyun oyi oxirida yakuniga yetadi va u uzaytirilmaydi. Bu esa Stonesning erkin agent sifatida Myunxen jamoasiga oʻtishi mumkinligini anglatadi. Bu haqda Goal.com xabar beradi.
Ushbu transferda Bavariya bosh murabbiyi Vensan Kompani asosiy rolni oʻynashi kutilmoqda. Kompani oʻz vaqtida Manchester Siti safida Stones bilan birga toʻp surgan va uning imkoniyatlarini yaxshi biladi. Shuningdek, Stonesning Angliya terma jamoasidagi jamoadoshi Harry Kane ham ayni damda Myunxen klubi sharafini himoya qilmoqda. Maʼlumotlarga koʻra, Germaniya rekordchisi fevral oyidayoq futbolchi bilan aloqaga chiqqan.
John Stones Manchester Siti tarkibida olti bor Angliya Premer-ligasi gʻolibi boʻlgan va 2023-yilda Chempionlar ligasi kubogini qoʻlga kiritgan. Biroq 2025/26-yilgi mavsumda jarohatlar tufayli Pep Guardiola qoʻl ostida bor-yoʻgʻi 17 ta oʻyinda maydonga tushdi. Bavariya tarkibida Dayot Upamecano va Jonathan Tah kabi asosiy himoyachilar borligiga qaramay, jamoa zaxira oʻrindigʻini kuchaytirishni maqsad qilgan.
Shu bilan birga, Manchester Siti himoyachisi Josko Gvardiol ham Myunxen klubiga oʻtishga qiziqish bildirayotgani haqida xabarlar tarqalmoqda. Gvardiol Bavariya klubining ashaddiy muxlisi ekani va yozda jamoasini tark etishni xohlayotgani aytilmoqda. Stonesdan farqli oʻlaroq, Gvardiolning transferi klub uchun ancha qimmatga tushishi mumkin, ammo u chap qanot himoyasida ham oʻynay olishi bilan rahbariyatni oʻziga jalb qilmoqda.
