Xiaomi 13 kg sigʻimli yangi kir yuvish mashinasini taqdim etdi

Xiaomi kompaniyasi Xitoyda oldindan buyurtma berish uchun ochiq boʻlgan yangi Xiaomi Mijia Washing Machine Pro Supreme Edition kir yuvish mashinasi haqida qoʻshimcha tafsilotlarni maʼlum qildi. Qurilmaning asosiy qulayliklaridan biri yuvish vositalarini intellektual dozalash tizimidir. Bu haqda Ixbt.com xabar beradi.

Ushbu texnologiya tufayli foydalanuvchi kir yuvish kukuni va konditsionerni bir marta toʻldirib qoʻysa, u taxminan bir oyga yetadi. Bu har safar kir yuvishdan oldin qoʻlda kukun solish zaruratini bartaraf etadi va jarayonni toʻliq avtomatlashtiradi.

Xiaomi Mijia Washing Machine Pro Supreme Edition oʻnlab yuvish va parvarishlash dasturlarini taklif etadi. Ular orasida patli kiyimlar uchun maxsus rejimlar, uy hayvonlari junidan tozalash funksiyasi hamda atigi 36 daqiqa davom etadigan tezkor yuvish rejimi mavjud.

Past haroratli intellektual quritish funksiyasi kiyimlarning quriganlik darajasini avtomatik aniqlaydi va jarayonni oʻz vaqtida toʻxtatadi. Bu matoning shikastlanishidan himoya qiladi. Shuningdek, super-elektroliz texnologiyasi yordamida kiyimdagi 20 xil eng qiyin dogʻlarni, jumladan, qon, sharbat va soya qaylasi izlarini samarali tozalaydi.

Yangi model nafaqat dogʻlarni ketkazadi, balki oqartirish va ranglarning oʻchib ketishidan himoya qilish xususiyatiga ham ega. Qurilma zamonaviy dizayn va yuqori samaradorlikni oʻzida mujassam etgan.