2GIS ilovasi koʻzi ojiz foydalanuvchilar uchun moslashtirildi
Android platformasidagi 2GIS ilovasi endilikda TalkBack funksiyasini qoʻllab-quvvatlay boshladi. Ushbu texnologiya interfeysni ovozli tarzda oʻqib berishga moʻljallangan boʻlib, koʻzi ojiz va koʻrish qobiliyati zaif foydalanuvchilarga ilovadan foydalanishda koʻmaklashadi. Bu yangilik shahar boʻylab navigatsiyani osonlashtiradi, tashkilotlarni topish va ovozli buyruqlar yordamida yoʻnalishlar chizish imkonini beradi. Bu haqda Ixbt.com xabar beradi.
Avvalroq shunga oʻxshash funksiya iPhone qurilmalarida ham joriy etilgan edi. iOS tizimining oʻrnatilgan VoiceOver funksiyasi bilan integratsiya qilingan 2GIS ilovasi ekrandagi maʼlumotlarni ovozli matnga aylantiradi. Foydalanuvchilar maxsus imo-ishoralar va ovozli buyruqlar orqali ilova bilan toʻliq muloqot qilishlari mumkin.
Android tizimidagi TalkBack funksiyasi interfeysning barcha elementlarini, jumladan, tugmalar, roʻyxatlar va joylarning kartochkalarini ovozli tarzda tavsiflaydi. Foydalanuvchilar kerakli manzillarni topishlari, dolzarb maʼlumotlarni olishlari, telefon raqamlariga qoʻngʻiroq qilishlari va jamoat transporti yoʻnalishlarini bilib olishlari mumkin. Shuningdek, ilova qaysi bekatda tushish kerakligini ham ovozli tarzda bildiradi.
TalkBack funksiyasini faollashtirish uchun Android smartfonining sozlamalar boʻlimiga kirish kifoya: Sozlamalar => Maxsus imkoniyatlar => TalkBack. 2GIS ilovasining oʻzida qoʻshimcha sozlamalarni amalga oshirish talab etilmaydi — servis avtomatik ravishda ovozli rejimda ishlashga tayyor boʻladi.
