Aito M9 osmasi shunchalik silliqki, foydalanuvchilar uni sunʼiy intellekt deb oʻylashdi
Yaqinda ijtimoiy tarmoqlarda Aito M9 avtomobilining faol osma tizimi imkoniyatlari aks etgan reklama videosi keng muhokamalarga sabab boʻldi. Videoda avtomobil soatiga 60 km tezlikda notekis yoʻlda harakatlanayotgani, gʻildiraklar va osma tizim barcha chuqurliklarni yutib yuborayotgani, korpus esa deyarli qimirlamayotgani tasvirlangan. Koʻplab foydalanuvchilar ushbu kadrlar haqiqiyligiga shubha qilib, uni sunʼiy intellekt yordamida yaratilgan deb taxmin qilishdi. Bu haqda Ixbt.com xabar beradi.
Huawei kompaniyasining PR-boʻlimi ushbu shubhalarga javoban oddiy, reklama boʻlmagan videoni eʼlon qildi. Unda yangi Aito M9 modelining faol osma tizimi real sharoitda qanday ishlashi koʻrsatib berilgan. Ishlab chiqaruvchilarning taʼkidlashicha, videodagi silliq harakat hech qanday maxsus effektlarsiz, faqatgina texnologik ustunlik evaziga erishilgan.
Yangi avlod Aito M9 modeli Huawei Tuling intellektual shassisi bilan jihozlangan. Bu HarmonyOS boshqaruvi ostidagi toʻliq faol osma tizimiga ega boʻlgan birinchi seriyali modelga aylanadi. Tizim yoʻl holatini soniyasiga yuzlab marta tahlil qilib, har bir gʻildirakning harakatini alohida nazorat qiladi.
Texnik jihatdan avtomobil old qismida toʻrtta sharli sharnirli mustaqil osma va orqa qismida besh richagli osma tizimiga ega. Butunlay alyuminiydan ishlangan shassi, ikki kamerali yopiq turdagi pnevmatik prujinalar hamda CDC amortizatorlari yoʻldagi har qanday tebranishlarni maksimal darajada kamaytirishga xizmat qiladi.
