Xitoyda koʻp marta ishlatiladigan universal raketa dvigateli yaratildi
Xitoyning Sian shahrida joylashgan Mega Engine Technology startapi kerosin va suyuq kislorod juftligida ishlaydigan, yopiq siklli istiqbolli suyuq raketa dvigatelining uzoq muddatli olovli sinovlari muvaffaqiyatli yakunlanganini eʼlon qildi. “Chi” (tarjimasi — “Alanga”) deb nomlangan ushbu kuch qurilmasi haqidagi rasmiy maʼlumot 25-may kuni Xitoy ijtimoiy tarmoqlarida eʼlon qilindi. Bu haqda Ixbt.com xabar beradi.
Sinovlar davomida dvigatelning bitta nusxasi hisoblangan ish rejimida jami 1000 soniya davomida ishladi, butun sinov dasturi doirasida esa qurilmalarning umumiy ish vaqti 2000 soniyaga yetdi. Kompaniya vakillarining soʻzlariga koʻra, oksidlovchi generator gazini qayta yoquvchi yuqori texnologiyali suyuq raketa dvigateli (SRD) tezkor ishga tushish va barcha bosqichlarda barqaror ishlashni namoyish etdi. Yakuniy tekshiruvlar ekstremal issiqlik yuklamalaridan soʻng barcha apparat qismlari va ichki komponentlar butun qolganini koʻrsatdi.
Yaratilgan kuch agregati 80 tonnalik tortish kuchiga ega sinfga mansub. Dvigatel tortish darajasini yer sathida 35 tonnadan 75 tonnagacha sozlash imkoniyatiga ega, vakuum sharoitida esa maksimal 87 tonna kuch bera oladi. Qurilmaning solishtirma impulsi dengiz sathida 302 soniyani, balandlikda esa 350 soniyani tashkil etadi. SRDning asosiy afzalligi uning koʻp marta ishlatilishidir: u vektor boshqaruvi va oʻzgaruvchan tortish darajasini qoʻllab-quvvatlaydi, shuningdek, parvoz paytida bir necha bor qayta ishga tushirishga moʻljallangan.
Shu sababli, ushbu qurilma oʻrta va ogʻir raketa tashuvchilarning ikkinchi va yuqori bosqichlarida, shuningdek, yengil hamda oʻrta raketalarning birinchi bosqichida asosiy dvigatel sifatida foydalanish uchun mos keladi. Mega Engine Technology oʻz faoliyatini 2024-yil boshida boshlagan boʻlsa-da, qisqa vaqt ichida toʻliq ishlaydigan va yuqori samarali yopiq siklli kerosin-kislorodli SRDni namoyish eta oldi. Sianlik startapning strategik maqsadi yangi avlod raketa tashuvchilarini ishlab chiqayotgan tijoriy kompaniyalarni ishonchli dvigatellar bilan taʼminlashdan iborat.
