OpenRouter kompaniyasi bir yil ichida oʻz qiymatini 1,3 milliard dollarga yetkazdi
2023-yilda asos solingan mashhur sunʼiy intellekt geytveylari ishlab chiqaruvchisi OpenRouter kompaniyasi Google’ning bosh kompaniyasi Alphabet’ga tegishli CapitalG venchur fondi boshchiligida 113 million dollarlik B seriyali investitsiya jalb qildi. Startap oʻzining yangi bozor qiymatini rasman ochiqlamagan boʻlsa-da, The New York Times nashrining xabar berishicha, kompaniya bahosi 1,3 milliard dollarga yetgan. Bu haqda Techcrunch.com xabar beradi.
Bu koʻrsatkich oʻtgan yilgi 547 million dollarlik baholashga nisbatan sezilarli oʻsishdir. Oʻshanda kompaniya Andreessen Horowitz va Menlo Ventures boshchiligidagi A seriyasida 40 million dollar toʻplagan edi. Bir yil ichida sunʼiy intellekt sohasidagi asosiy eʼtibor modellarni oʻqitishdan ularni amaliyotda qoʻllash (inference) va agentlar yaratishga koʻchgani OpenRouter mashhurligining oshishiga xizmat qildi.
OpenRouter platformasi korxonalar va foydalanuvchilarga xarajatlarni nazorat qilish hamda aniqlikni oshirish uchun turli vazifalarga mos modellarni tanlash imkonini beradi. Hozirda servis Anthropic, Google, OpenAI, xAI va DeepSeek kabi provayderlarning 400 dan ortiq modellariga kirish huquqini taqdim etadi.
Kompaniya maʼlumotlariga koʻra, platformaning global foydalanuvchilari soni 8 millionga yetgan boʻlib, oyiga 100 trillion token qayta ishlanmoqda. Bu atigi olti oy oldingi koʻrsatkichdan besh baravar koʻpdir. OpenRouter muvaffaqiyati shuni koʻrsatadiki, kelajakda kompaniyalar bitta model yetkazib beruvchisiga bogʻlanib qolishni istamaydi va koʻp modelli (multi-model) ekotizim allaqachon haqiqatga aylangan.
