Ispaniyada 200 ming kishi shilliqqurt festivaliga yig‘ildi

Ispaniyaning Lleyda shahrida an’anaviy “Aplec del Caragol” festivali boshlandi. Uch kun davom etadigan ushbu yirik gastronomik bayramga bu safar har yilgidan ko‘proq sayyohlar tashrif buyurgani qayd etilmoqda.

Ma’lumotlarga ko‘ra, festival davomida taxminan 14 tonna shilliqqurt iste’mol qilinishi rejalashtirilgan. Tadbirga 200 mingga yaqin odam yig‘ilgani aytilmoqda.

1980 yilda kichik oilaviy yig‘in sifatida boshlangan ushbu an’ana yillar davomida kengayib, bugungi kunda dunyodagi eng yirik shilliqqurt iste’mol qilinadigan festivallardan biriga aylangan.

Bayram doirasida nafaqat taomlanish tadbirlari, balki rang-barang paradlar, jonli musiqa chiqishlari va ko‘cha tomoshalari ham o‘tkaziladi. Shahar ko‘chalari festival ruhiga mos ravishda bezatilib, bayramona kayfiyat hukm suradi.

Mahalliy oshpazlar shilliqqurtlarni turli souslar, zaytun moyi va achchiq ziravorlar bilan grilda tayyorlashadi. Ishtirokchilar esa bu taomlarni katta ishtaha bilan tatib ko‘rishadi.

Mazkur festival Ispaniyaning eng mashhur gastronomik an’analaridan biri bo‘lib, har yili minglab sayyohlarni o‘ziga jalb etadi.