FAA SpaceX kompaniyasiga Starship V3 nosozligini tekshirishni buyurdi
AQSH Federal aviatsiya boshqarmasi (FAA) SpaceX kompaniyasiga 22-may kuni amalga oshirilgan Starship sinov parvozi vaqtida yuz bergan nosozlik sabablarini oʻrganishni buyurdi. Bu qaror kompaniya tergov yakunlanib, natijalar FAA tomonidan tasdiqlanmaguncha yangi parvozlarni toʻxtatib turishi kerakligini anglatadi. Bu holat SpaceX’ning iyun oyi oʻrtalariga rejalashtirilgan kutilayotgan IPO jarayonidan oldin navbatdagi sinovni oʻtkazish imkoniyatlarini kamaytiradi. Bu haqda Techcrunch.com xabar beradi.
FAA bayonotiga koʻra, Starship Flight 12 missiyasi davomida Super Heavy kuchaytirgichi (booster) bilan bogʻliq koʻngilsiz hodisa yuz bergan. Raketa pogʻonasi ajralganidan soʻng, kuchaytirgich Amerika koʻrfaziga qaytayotgan vaqtda muammolar yuzaga kelgan. Rasmiylarning taʼkidlashicha, hodisa oqibatida jamoat mulkiga zarar yetmagan va hech kim jarohat olmagan. Endilikda SpaceX ushbu tergovni FAA nazorati ostida olib boradi va barcha tuzatish choralarini kelishishi shart boʻladi.
Muammo Starship tizimining yangilangan uchinchi versiyasi (V3) parvozining dastlabki daqiqalarida sodir boʻldi. Raketa maksimal dinamik bosim nuqtasidan oʻtib, koinotga chiqishga muvaffaq boʻlgan boʻlsa-da, kuchaytirgich kemadan ajralgach, dvigatellar ishida nosozlik kuzatildi. Janubiy Texasdagi start maydoniga qaytish uchun moʻljallangan yonish jarayoni amalga oshmadi, natijada booster nazoratni yoʻqotib, suvga urilishdan oldin portlab ketgan boʻlishi taxmin qilinmoqda.
SpaceX ushbu uchinchi versiyada raketani yanada ishonchli qilish uchun koʻplab oʻzgarishlar kiritgan edi, jumladan, yangi avlod Raptor dvigatellari oʻrnatilgandi. Biroq, parvoz davomida kemaning oʻzidagi oltita Raptor dvigatelidan biri ham ishdan chiqqan. Kompaniya uchun Starship loyihasining muvaffaqiyati oʻta muhim, chunki u Starlink xizmatini kengaytirish va koinotga yuk tashish xarajatlarini kamaytirishning asosiy omili hisoblanadi.
