Google DeepMind Erdyoshning toʻqqizta ochiq masalasini yechishga muvaffaq boʻldi
Google DeepMind kompaniyasi AlphaProof Nexus deb nomlangan yangi matematik freymvorkni taqdim etdi. Ushbu tizim mashhur matematik Paul Erdos roʻyxatidagi toʻqqizta ochiq masalani mustaqil ravishda yechishga muvaffaq boʻldi. Ularning ayrimlari yarim asrdan koʻproq vaqt davomida yechimsiz qolib kelayotgan edi. Shuningdek, tizim Butun sonli ketma-ketliklar onlayn ensiklopediyasidagi (OEIS) 44 ta gipotezani isbotladi va algebraik geometriyadagi 15 yillik muammoni hal qildi. Bu haqda Ixbt.com xabar beradi.
AlphaProof Nexus tizimining asosiy xususiyati Gemini 3.1 Pro til modeli va Lean rasmiy matematik tekshirish tizimining uygʻunligidir. Oddiy LLM modellaridan farqli oʻlaroq, ushbu tizim isbotlarni tabiiy tilda emas, balki Lean dasturlash tilida bosqichma-bosqich shakllantiradi. Har bir qadam kompilyator tomonidan avtomatik tekshiriladi. Agar xatolik yuz bersa, Lean aniq xabar qaytaradi va model keyingi urinishda undan xulosa chiqaradi. Bu yondashuv sunʼiy intellektning mantiqiy xatolarga yoʻl qoʻyishini (gallyutsinatsiya) oldini oladi.
Tadqiqotchilarning soʻzlariga koʻra, bitta masalani yechish uchun sarflangan hisoblash xarajatlari bir necha yuz dollarni tashkil etgan. Tizim ayniqsa kombinatorika, sonlar nazariyasi va qabariq optimallashtirish kabi Mathlib kutubxonasi yaxshi rivojlangan sohalarda yuqori natija koʻrsatdi. Shunga qaramay, Erdyoshning 353 ta ochiq masalasidan hozircha faqat toʻqqiztasi yechildi, bu esa sunʼiy intellekt uchun hali qilinadigan ishlar koʻpligidan dalolat beradi.
DeepMind mutaxassislari AlphaProof Nexus matematiklar oʻrnini bosmasligini, balki yangi tadqiqot vositasiga aylanishini taʼkidlamoqda. Tizim tomonidan taqdim etilgan barcha rasmiy isbotlar GitHub platformasida eʼlon qilindi. Ushbu ish OpenAI kabi raqobatchilarning matematik tadqiqotlar sohasidagi yutuqlari fonida amalga oshirildi. Masalan, avvalroq OpenAI oʻzining reasoning-modeli yordamida Erdyoshning masofalar haqidagi gipotezasini rad etgan edi.
