Ресейдің "Tatneft" компаниясы Ташкент облысының Ангрень қаласында күн энергиясын өндіру жобасын Үндістанның Universal Carbon Registry платформасында тіркеді. "Tatneft" баспасөз қызметінің хабарлауынша, Ангреньдегі шина шығаратын зауыттың шатырларына жалпы қуаты 0,33 МВт болатын күн электр станциялары орнатылған.
Күннен алынатын энергияны кәсіпорын өзі пайдаланады және бұл ішінара өңірлік желіден алынатын, көмірқышқыл газын көп мөлшерде бөлетін энергияны алмастырады. Компанияның есептеулеріне сәйкес, жоба жыл сайын парниктік газдар шығарындыларын шамамен 206 тонна CO₂ эквивалентіне азайтуға мүмкіндік береді.
"Tatneft" бұл бастаманы энергетика саласында жаңа технологиялық платформаларды енгізу және климат бойынша ынтымақтастықтың жаңа түрлерін зерделеу үшін стратегиялық қадам ретінде бағалайды.
