Янги УАЗ Патриот намойиш этилди: замонавий салон, янги двигател ва дизайн
ХаДм инсайдери янгиланган УАЗ Патриот йўлтанламасининг илк суратларини эълон қилди. Автомобил янги агрегатлар ва сезиларли даражада такомиллаштирилган жиҳозлар билан бозорга чиқишга тайёрланмоқда. Дастлабки маълумотларга кўра, машина 136 от кучига эга 2,0 литрли JAC дизел двигатели ва 6 поғонали механик узатмалар қутиси билан таъминланиши айтилган эди. Бу ҳақда Ixbt.com хабар беради.
Кейинчалик муаллиф суратларда 150 от кучига эга ЗМЗ Pro бензинли моторли версия акс этганини аниқлаштирди. Шунга қарамай, JAC компонентларига асосланган дизел модификациялари ишлаб чиқариш режада борлиги тасдиқланди. Ташқи кўринишда янги светодиодли фаралар, модернизация қилинган чироқлар ва олд парктрониклар кўзга ташланади.
Автомобил салони ҳам сезиларли даражада янгиланган. Унда замонавий мультирул, иқлим назорати (климат-контрол) тугмалари, янги мультимедиа экрани ва интерерни визуал жиҳатдан қимматроқ кўрсатувчи бир қатор элементлар пайдо бўлган. Бу ўзгаришлар ҳайдовчи ва йўловчилар учун қулайлик даражасини оширишга хизмат қилади.
Янги УАЗ Патриот сотувлари 2026-йилда бошланиши кутилмоқда. Тахминий бошланғич нарх 2 миллион рубл атрофида бўлиши айтилмоқда, бироқ янги дизел двигателли ва кенгайтирилган опсияли топ-версиялар нархи сезиларли даражада юқори бўлиши мумкин.
