АҚШга танқид кучайди: саудиялик журналист кескин баёнот берди

Саудиялик журналист Муборак Ал-Ати АҚШ сиёсатига нисбатан кескин фикрлар билдирди. Унинг таъкидлашича, Саудия Арабистони нефтни қайта ишлаш инфратузилмасига Эрон томонидан амалга оширилган ҳужум пайтида АҚШ кутилган ёрдамни кўрсатмаган.

Журналистнинг сўзларига кўра, ўша пайтда расмий Эр-Риёд Вашингтондан қўллаб-қувватлаш сўраган, бироқ АҚШ бу вазиятда сукут сақлаган. У мазкур ҳолатни иттифоқчилик муносабатларига зид дея баҳолади.

Муборак Ал-Ати шунингдек, бугунги кунда Саудия Арабистони ва Эрон ўртасидаги муносабатларни яхшилаш ва тарангликни юмшатишга қаратилган ҳаракатлар давом этаётганини қайд этди. Унинг фикрича, айнан шу жараёнда АҚШ турли йўллар билан тўсқинлик қилмоқда.

“Эрон нефтни қайта ишлаш заводимизга ҳужум қилганида, биз АҚШдан ёрдам сўрадик, аммо улар жим туришди.

Энди биз Эрон билан тинчлик ўрнатишга ва кескинликни камайтиришга ҳаракат қилаётганимизда, Америка бу жараённи саботаж қилмоқда.

Улар урушни хоҳлашади. АҚШ ҳарбий империя. У можаросиз мавжуд бўла олмайди”— дея таъкидлади журналист.

Ушбу баёнот халқаро майдонда АҚШнинг Яқин Шарқдаги роли ва унинг ташқи сиёсати борасидаги баҳсларни янада кучайтириши мумкин.