Дунёдаги энг йирик технокўргазма эшиклари Россия учун ёпилди

^{Фото: «Geeknetic»}
Дунёдаги энг йирик мобил саноат кўргазмаси — Mobile World Congress (MWC) Россияга ўз павильонларини ажратишдан бош тортди. Ушбу тадбир ташкилотчиси — Глобал мобил коммуникация тизимлари ассоциацияси (GSMA) ушбу қарорга келди.

Сабаб — Украина билан боғлиқ вазият туфайли Европа иттифоқи ва АҚШ қўллаган санкциялар.

«Биз халқаро санкцияларга асосланиб ишлаймиз, қолаверса, санкциялар рўйхатида номлари кўрсатилган компанияларнинг қатнашиши ҳам тақиқланган», — деди «Reuters» билан суҳбатда GSMA раҳбари Жон Ҳоффман. «Албатта, бу ривожланиб борадиган вазият, биз уни кузатишда давом этамиз», — қўшимча қилди у.

MWC — мобил саноатнинг энг йирик кўргазмаларидан бири, 2006 йилдан бери мунтазам ҳар йили Барселона (Испания)да ўтказилади. Бу сафаргиси 2022 йилнинг 28 февралида бошланиб, 3 мартгача давом этади. Технологиялар улкан шоусига 40–60 минг киши келиши кутиляпти — пандемия бошланганидан бери ташкиллаштирилаётган одамлар иштирокидаги энг йирик тадбирлардан бирига айланиши мумкин.