Айрим ҳудудларда одам ДНКси экспертизаси йўлга қўйилади

^{Фото: iStock}
Адлия вазирлиги ҳузуридаги Х. Сулаймонова номидаги Республика суд экспертизаси маркази фаолиятини янада такомиллаштириш ҳамда суд экспертизаси соҳасида экспертлик ишларини ривожлантириш чора-тадбирлари тўғрисидаги ҳукумат қарори қабул қилинди.

Х. Сулаймонова номидаги Республика суд экспертизаси марказининг Фарғона, Сурхондарё, Хоразм ҳудудий бўлимларида одам ДНКси суд-биологик экспертизаси ва Самарқандда одам ДНКсига қўшимча равишда материаллар, ашёлар ва буюмлар криминалистик экспертизаси лабораториялари ташкил қилинади.

Адлия вазирлиги 2022 йил 1 июлгача Самарқанддаги, 2022 йил 1 декабргача Фарғонадаги, 2024 йил 1 сентябргача экспертиза бўлимларини халқаро стандартларга мос биноларга жойлаштиради.

Шунингдек, вазирлик 2022 йил 1 ноябргача Хоразмдаги экспертиза бўлимини зарур техникалар билан таъминлайди.

2023 йил 1 январгача суд экспертиза хулосалари халқаро тан олинишини таъминлаш учун суд-фонография ва ҳужжатлар криминалистик экспертизаси лабораториялари халқаро аккредитациядан ўтказилади.