«Бока Хуниорс» клубида янги спорт директори иш бошлади
Аргентина гиганти «Бока Хуниорс» спорт директорлиги лавозимига Марсело Делгадони тайинлаганини эълон қилди. Клуб раҳбарияти у президент Хуан Рикелме билан яқин ҳамкорликда ишлашини таъкидлади. Бу ҳақда euro-football.ru хабар беради.
«Бока» таркибни тез фурсатда кучайтиришга муҳтож, шу боис Делгадонинг асосий вазифаларидан бири трансфер масалаларини жадаллаштириш ва жамоани қисқа муддатда мустаҳкамлаш бўлади.
Делгадо футболчилик фаолиятида ҳам салмоқли из қолдирган: у 1995–2002 йилларда Аргентина терма жамоасида 18 учрашувда майдонга тушган ва 1998 йилги жаҳон чемпионати баҳсларида ҳам иштирок этган.
Шунингдек, 2003 йилда у Либертадорес кубогининг энг яхши тўпурари бўлган — бу натижани «Сантос» ҳужумчиси бразилиялик Рикардо Оливейра билан бўлишиб олган.
