Жоао Канцело Европанинг тўртта топ-лигасида чемпион бўлган илк футболчига айланди
Барселона жамоаси Эл-Класикода Реал Мадрид устидан 2:0 ҳисобида ғалаба қозониб, муддатидан аввал Испания чемпионлигини қўлга киритди. Ушбу муваффақият нафақат каталонияликлар учун 29-чемпионлик унвони, балки ҳимоячи Жоао Канцело учун ҳам тарихий воқеа бўлди. Бу ҳақда Goal.com хабар беради.
Январ ойида Ал Ҳилал клубидан ижарага олинган Жоао Канцело жорий мавсумда Барселона таркибида асосий ўйинчилардан бирига айланди. У 13 та учрашувда майдонга тушиб, 1 та гол ва 3 та голли узатмага муаллифлик қилди. Ханси Флик қўл остидаги жамоанинг кетма-кет 11-ғалабаси португалиялик футболчининг фаолиятидаги муҳим ютуққа айланди.
Ушбу ғалаба орқали Жоао Канцело Европанинг кучли бешлик лигаларидан тўрттасида чемпионликни қўлга киритган тарихдаги илк футболчига айланди. У бунгача Ювентус билан Италия А Сериясида, Манчестер Сити билан Англия Премер-лигасида ва Бавария билан Германия Бундеслигасида зафар қучган эди.
Футбол тарихида Давид Бекхам, Криштиано Роналдо ва Златан Ибраҳимовик каби юлдузлар учта турли топ-чемпионатда ғолиб чиқишган бўлса-да, тўртинчи лигани забт этиш ҳеч кимга насиб этмаган эди. Жоао Канцело эндиликда фақат Франция чемпионатини қўлга киритиш орқали барча топ-лигаларни тўлиқ забт этиш имкониятига эга.
