Бетҳ Меад Арсенал билан хайрлашмоқда
Англия аёллар футболи юлдузи Бетҳ Меад ёзги трансфер ойнасида Арсенал жамоасини тарк этиши расман эълон қилинди. Тўққиз йиллик фаолияти давомида у клуб тарихидаги энг муҳим ўйинчилардан бирига айланди ва жамоа билан олтита йирик совринни, жумладан Чемпионлар лигаси ғолиблигини қўлга киритди. Бу ҳақда Goal.com хабар беради.
Меад 2017-йилдан буён Лондон клуби шарафини ҳимоя қилиб, 258 та учрашувда майдонга тушди ва 83 та гол урди. У шунингдек, Аёллар Суперлигаси (ВСЛ) тарихидаги энг кўп голли узатмани амалга оширган футболчи ҳисобланади. Гарчи клуб раҳбарияти у билан шартномани узайтиришга уринган бўлса-да, футболчи фаолиятини бошқа жойда давом эттиришга қарор қилди.
Арсенал директори Кларе Вҳеатлей ўз баёнотида Меаднинг клуб тарихидаги ўрни беқиёс эканлигини таъкидлаб, унга келгуси фаолиятида муваффақиятлар тилади. ОАВ хабарларига кўра, тажрибали ҳужумчига Манчестер Сити жамоаси жиддий қизиқиш билдирмоқда.
Жорий мавсум якунида Арсенал сафини тарк этадиган футболчилар фақат Меад билан чекланиб қолмайди. Клуб, шунингдек, Лаиа Кодина ва Викториа Пелова билан хайрлашишини маълум қилди. Пелова 2023-йилда жамоага келиб қўшилган бўлса-да, жиддий жароҳат сабабли асосий таркибдаги ўрнини тиклашда қийинчиликларга дуч келди.
