Жоао Педро мундиалдан четда қолганига муносабат билдирди
«Челси» ҳужумчиси Жоао Педро Бразилия миллий жамоасининг 2026 йилги Жаҳон чемпионати учун якуний таркибидан тушиб қолганига муносабат билдирди. Форвард Карло Анчелотти танловидан кейин ҳафсаласи пир бўлганини яширмади, аммо бу ҳолат уни тўхтатиб қўймаслигини таъкидлади.
Аввалроқ Бразилия терма жамоасининг мундиал учун якуний қайдномаси эълон қилинган, бироқ Жоао Педро ушбу рўйхатдан жой олмаганди. Бу қарор айниқса унинг жорий мавсумдаги кўрсаткичларини ҳисобга олганда, мухлислар орасида муҳокамаларга сабаб бўлди.
Ҳужумчи Англия Премьер-лигасининг ушбу мавсумида 34 та учрашувда майдонга тушиб, 15 та гол уришга муваффақ бўлди. Бу натижа унинг «Челси» ҳужумида муҳим роль ўйнаганини кўрсатади.
Шунга қарамай, Бразилия мураббийлар штаби якуний таркибда бошқа футболчиларга ишонч билдирган. Жоао Педро эса бу қарорни оғир қабул қилган бўлса-да, руҳан тушкунликка тушмаслигини маълум қилди.
«Ҳар доим максимум куч билан ҳаракат қиламан. Афсуски, орзуга етиш насиб қилмади — жаҳон чемпионатида она ватаним жамоаси шарафини ҳимоя қилиш, лекин хотиржамман ва доимгидек меҳнат қилишда давом этаман», — деб ёзди Жоао Педро.
Футболчи учун Бразилия либосида Жаҳон чемпионатида иштирок этиш катта орзу бўлгани аниқ. Аммо унинг билдирган муносабатида алам билан бирга профессионаллик ҳам сезилади. У танловни қабул қилмоқда ва кейинги имкониятлар учун ўз устида ишлашда давом этмоқчи.
Қисқаси, Жоао Педро мундиал таркибидан четда қолди, аммо таслим бўлиш ниятида эмас. 15 голли мавсум — ёмон жавоб эмас, лекин Бразилия термасига кириш учун рақобат доим осмонда. Энди форвард учун энг тўғри йўл — янада кучли қайтиш.
