Алиреза Фироузжа соғлиғига қарамай турнирни давом эттиради
Франциялик гроссмейстер Алиреза Фироузжа соғлиғидаги жиддий муаммоларга қарамай, Руминияда ўтаётган Grand Chess Tour турнирида иштирокини давом эттиришга қарор қилди. Шахматчининг бу қарори мухлислар ва мутахассислар орасида катта ҳурмат билан қабул қилинмоқда.
Фироузжанинг айтишича, ҳозир унга дам олиш зарур, аммо у мусобақани тарк этишни истамаётганини билдирган. У шахматнинг ўзига хос жиҳати — уни ҳатто каравотда ётиб ҳам ўйнаш мумкинлигини таъкидлади.
“Менга барибир дам олиш керак. Хайриятки, шахматни ҳатто каравотда ётиб ҳам ўйнаш мумкин. Мен ўйнашда давом этмоқчиман, чунки олдинда ҳали бешта яхши партия бор. Булар қизиқарли ўйинлар бўлади, мен улардан нимадир ўрганишим аниқ”, — деди Фироузжа.
Гроссмейстер шифокорлар билан маслаҳатлашганини ҳам айтиб ўтди. Унинг сўзларига кўра, агар ўйин вақтида махсус шароит яратилса, яъни у оёғини кўтарган ҳолда каравотда ётиб ўйнаса, мусобақада иштирок этиши мумкинлиги айтилган.
“Шифокорга борганимизда, у агар шароитлар мос келса, яъни мен ўйин давомида доимо оёғимни кўтариб, каравотда ётсам, ўйнашим мумкинлигини айтди. Кейинги савол ташкилотчилар буни ташкил қила олиши ва рақиб ўйинчилар бунга рози бўлиши билан боғлиқ эди. Ҳаммаси ижобий ҳал бўлди. Шундай вазиятда ўйинларни бой бериш жуда ачинарли бўларди”, — дея қўшимча қилди у.
Бу ҳолат Фироузжанинг нафақат истеъдоди, балки иродаси ва шахматга бўлган муносабатини ҳам кўрсатади. Одатда бундай шароитда спортчи мусобақани тарк этиши мумкин, аммо у ҳар бир партиядан сабоқ олиш ва курашни давом эттиришни афзал кўрмоқда.
Фироузжа Жавоҳир Синдаровга қарши партияси ҳақида ҳам фикр билдирди. У ўйиндан тўлиқ қониқмаганини, аммо эндшпилдаги ҳаракатларидан мамнун бўлганини айтди.
“Синдаров билан ўйин унчалик қониқарли бўлмади, лекин охирида, позициям анча ёмон бўлишига қарамай, эндшпилда яхшироқ ўйнашга муваффақ бўлдим. Аввалига яхши ўйнамаган бўлсам-да, эндшпил қандай ўтганидан мамнунман”, — деди шахматчи.
Қисқаси, Алиреза Фироузжа оғир ҳолатга қарамай, Grand Chess Tour турнирини давом эттиришга бел боғлади. Бу ерда гап фақат шахмат ҳақида эмас, характер ҳақида ҳам кетяпти. Каравотда ётиб бўлса ҳам партияни давом эттириш — бу ҳақиқий спортчи руҳи.
