Артета АПЛда ноёб тарих яратган илк мураббий бўлди...
“Арсенал” бош мураббийи Микель Артета Англия Премьер-лигаси тарихида ўзига хос натижага эришди. 44 ёшли испаниялик мутахассис жамоа бош мураббийи сифатида АПЛ чемпионлигини қўлга киритган лиганинг биринчи собиқ футболчисига айланди.
Бу ҳақда Football on TNT Sports саҳифаси хабар берди. Артета футболчилик фаолияти давомида Англия Премьер-лигасида узоқ йиллар тўп сурган. У “Эвертон” сафида 209 та, “Арсенал” таркибида эса 150 та учрашувда майдонга тушган.
Энди эса у айнан собиқ клуби “Арсенал”ни Англия чемпионлигига олиб чиқди. Бу нафақат мураббийнинг шахсий ютуғи, балки Лондон клуби учун ҳам тарихий воқеа бўлди.
19 май куни Артета бошчилигидаги “Арсенал” 2025/26 йилги мавсумда Англия Премьер-лигаси чемпионлигини муддатидан олдин расмийлаштирди. “Тўпчилар” шу тариқа 22 йиллик узоқ танаффусга нуқта қўйди.
Чемпионлик 37-тур ўйинларидан кейин аниқ бўлди. “Арсенал” қийин баҳсда “Бёрнли”ни мағлуб этди. Шу вақтда асосий таъқибчи “Манчестер Сити” сафарда “Борнмут” билан 1:1 ҳисобида дуранг ўйнади ва математик жиҳатдан чемпионлик имкониятини йўқотди.
Артета учун бу ғалаба катта меҳнат, сабр ва узоқ қурилган лойиҳанинг натижаси бўлди. У “Арсенал”га келганидан бери жамоани босқичма-босқич ўзгартирди, ёш футболчиларга ишонч берди ва клубга ғалаба руҳини қайтарди.
Қисқаси, Микель Артета “Арсенал” билан нафақат чемпион бўлди, балки АПЛ тарихига ҳам кирди. Собиқ футболчи сифатида лигада ўйнаган, кейин эса шу лигада мураббий сифатида чемпионликка эришган биринчи номга айланди. Бу энди шунчаки чемпионлик эмас — футболчи Артетадан мураббий Артетагача бўлган катта йўлнинг олтин нуқтаси.
