Сабзи кўриш қобилиятини яхшилаши ростми?
Сабзи фойдали сабзавотлардан бири бўлиб, у айниқса кўз саломатлиги билан боғлиқ маҳсулот сифатида танилган. Кўпчилик сабзи кўриш қобилиятини яхшилайди деган фикрни эшитган. Мутахассисларнинг айтишича, бу гапда ҳақиқат бор.
Сабзи таркибида бета-каротин моддаси кўп бўлади. Организм ушбу моддани А витаминига айлантиради. Айнан А витамини кўз тўр пардаси фаолияти ва қоронғида кўриш қобилияти учун муҳим ҳисобланади. Шу сабаб организмда бу витамин етишмаса, кўриш билан боғлиқ муаммолар пайдо бўлиши мумкин.
Бироқ шифокорлар сабзи мўъжизавий маҳсулот эмаслигини ҳам таъкидлашади. Агар инсонда жиддий кўз касаллиги ёки генетик муаммо бўлса, фақат сабзи истеъмол қилиш орқали кўришни тиклаб бўлмайди. Сабзи кўпроқ кўз саломатлигини қўллаб-қувватлашга ёрдам беради.
