Уэйн Руни барча даврларнинг энг зўр мураббийи кимлигини айтди...
Англия миллий жамоаси ва «Манчестер Юнайтед» клуби собиқ ҳужумчиси Уэйн Руни футбол тарихидаги энг яхши мураббий кимлиги ҳақидаги саволга жавоб берди. Англиялик афсона бу борада сэр Алекс Фергюсонни биринчи ўринга қўйди.
Рунининг фикрича, Пеп Гвардиола ўз авлодининг энг кучли мураббийи ҳисобланади. Испаниялик мутахассис «Манчестер Сити» билан катта устунликка эришди, Премьер-лигада янги ўйин маданиятини шакллантирди ва рақибларидан анча олдинда эканини исботлади.
Шу билан бирга, Руни барча даврлар мезонида Фергюсонни алоҳида даражага қўяди.
«Мен Алекс Фергюсон билан жуда кўп солиштиришларни кўрдим. Айтишим мумкинки, Фергюсон — барча даврларнинг энг яхши мураббийи, аммо Пеп ўз авлодида шубҳасиз энг яхшиси ва у қолганлардан анча олдинда», — деди Руни.
Собиқ ҳужумчи Фергюсоннинг «Манчестер Юнайтед»даги 26 йиллик фаолиятини ақл бовар қилмас натижа деб баҳолади. Унинг фикрича, бу даражада узоқ вақт битта клубга садоқат билан ишлаш ва доимий равишда ғалаба учун курашиш жуда кам учрайдиган ҳолат.
Руни шунингдек, Фергюсон «Манчестер Юнайтед»га келганида клубдаги вазият ҳозирги «Манчестер Сити»дан анча фарқ қилганини таъкидлади. Унга кўра, сэр Алекс жамоани амалда нолдан қайта қурган ва йиллар давомида уни Англия ҳамда Европа футболидаги энг катта кучлардан бирига айлантирган.
Пеп Гвардиола эса бошқача шароитда иш бошлаган бўлса-да, унинг «Сити»даги тўлиқ устунлиги ва ўйин фалсафаси ҳам саволларга ўрин қолдирмайди. Руни айнан шу жиҳатни тан олиб, испаниялик мутахассиснинг замонавий футболга таъсирини юқори баҳолади.
Қисқаси, Руни учун умумий тарихда биринчи рақам — сэр Алекс Фергюсон. Аммо ҳозирги авлодда Пеп Гвардиолага тенг келадиган мураббий йўқ. Бири 26 йиллик империя қурган, иккинчиси футболни “апдейт” қилиб юборган. Таққослаш қийин, лекин баҳс мазза.
