Эрлинг Холандга Олтин тўпни ютиш учун нима кераклиги айтилди
Манчестер Сити ҳужумчиси Эрлинг Холанд сайёрамизнинг энг яхши футболчиси деб тан олиниши учун нима қилиши кераклиги маълум бўлди. Ливерпулнинг собиқ ҳимоячиси Джон Арне Риисе ГОАЛ нашрига берган интервюсида норвегиялик юлдуз Лионел Месси ва Криштиано Роналдо каби афсоналарнинг муносиб вориси бўлиши учун "жуда кўп миқдорда голлар" уриши шартлигини таъкидлади. Бу ҳақда Goal.com хабар беради.
Эрлинг Холанд 2022-23-йилги мавсумда Манчестер Сити билан Англия Премер-лигаси, Англия кубоги ва Чемпионлар лигасида ғолиб чиқиб, требл қайд этган ва 52 та гол урган эди. Бироқ, ўша йили Қатардаги жаҳон чемпионатида Аргентина терма жамоасини ғалаба сари етаклаган Лионел Месси саккизинчи бор Олтин тўпни қўлга киритди, Холанд эса иккинчи ўрин билан кифояланди.
Ҳозирда 25 ёшли ҳужумчи Манчестер Сити сафида 198 та ўйинда 162 та гол уришга улгурди ва Англия чемпионатидаги учинчи Олтин бутсасига яқин турибди. Риисенинг фикрича, Ламине Ямал ва Майкл Олисе каби ёш иқтидорлар ўзининг техник ҳаракатлари билан мухлислар эътиборини кўпроқ тортаётган бир пайтда, Холанд фақатгина рекорд даражадаги голлари билан улардан ўзиб кетиши мумкин.
"Эрлинг бир неча йил олдин бу совринни ютиши керак эди. Агар у яна даъвогарлик қилмоқчи бўлса, у шундай тизимда ўйнаши керакки, унда голлар сони ақлбовар қилмас даражада бўлиши лозим. Одамлар унинг жорий мавсумини ўртача дейишмоқда, лекин у барибир жуда кўп гол урмоқда. Агар у Премер-лиганинг янги рекордларини ўрнатса, уни эътиборсиз қолдириб бўлмайди", — дея қўшимча қилди Риисе.
Шунингдек, Норвегия терма жамоаси 1998-йилдан бери илк бор жаҳон чемпионатига йўлланма олиши кутилмоқда, бу эса Холандга халқаро майдонда ҳам ўзини кўрсатиш учун ажойиб имконият яратади. Ҳужумчи ўзининг феноменал натижаларини давом эттирса, яқин йилларда нуфузли совринни қўлга киритиши шубҳасиз.
