Давид Алаба Реал Мадридни тарк этмоқда: Навбатдаги бекат қаер?
Давид Алаба жорий мавсум якунлангач Реал Мадрид билан хайрлашади. Мадрид клуби жума куни австриялик ҳимоячининг якунига етаётган шартномаси узайтирилмаслигини расман тасдиқлади. Беш йиллик фаолиятдан сўнг, 33 ёшли футболчи эркин агент сифатида янги жамоа излашга тушади. Бу ҳақда Goal.com хабар беради.
Ҳозирда бир қатор топ-клублар Алабанинг ҳолатини диққат билан кузатиб бормоқда. ESPN нашрининг хабар беришича, Манчестер Юнайтед тажрибали ҳимоячини ўз сафига қўшиб олишга қизиқиш билдирмоқда. Шунингдек, Милан ҳам футболчи учун курашга киришиши мумкин. Трансфер инсайдери Fabrizio Romano эса АҚШ ва Саудия Арабистони клублари ҳам вазиятни ўрганаётганини қўшимча қилди.
Давид Алаба 2021-йилда Бавария сафидан Реал Мадридга келиб қўшилган эди. У Мадридда икки марта Чемпионлар лигаси ва икки марта Ла Лига ғолиблигини қўлга киритди. Бироқ, унинг Испаниядаги фаолиятига жиддий жароҳатлар соя солди. 2023-йил охиридаги тизза боғламлари узилиши ва кейинчалик мениск жароҳати туфайли у узоқ муддат майдонга туша олмади ва жорий мавсумда бор-йўғи 15 та ўйинда қатнашди.
Реал Мадрид президенти Флорентино Перез футболчига миннатдорчилик билдириб, "Реал Мадрид ҳар доим унинг уйи бўлиб қолади", дея таъкидлади. Шанба куни Атлетик Билбао билан бўладиган мавсумдаги сўнгги уй учрашувида Алаба учун хайрлашув маросими ўтказилади. Шундан сўнг, у Австрия терма жамоаси сардори сифатида Жаҳон чемпионатига йўл олади.
