Давид Алаба Реал Мадридни тарк этмоқда: Мадрид жамоаси у билан хайрлашади
Давид Алаба жорий мавсум якунлангач Реал Мадрид таркибини тарк этадиган бўлди. Мадрид клуби австриялик ҳимоячининг якунланаётган шартномасини узайтирмасликка қарор қилди. Пойтахт жамоаси ушбу қарорни жума куни расман тасдиқлади. 33 ёшли футболчининг кейинги манзили ҳозирча маълум эмас. Бу ҳақда Goal.com хабар беради.
2021-йилда Бавария сафидан Реал Мадридга келиб қўшилган Алаба клуб билан икки марта Чемпионлар лигаси ва икки бор Ла Лига ғолиблигини қўлга киритди. Бироқ, унинг Испания пойтахтидаги фаолиятига жиддий жароҳатлар катта тўсқинлик қилди: 2023-йил охирида тизза боғламларининг узилиши уни бир йилдан ортиқ муддатга сафдан чиқарди, 2025-йил ёзидаги мениск жароҳати эса тикланиш жараёнини янада узайтирди.
Жароҳатлар сабабли Алаба жорий мавсумда клуб сафида бор-йўғи 15 та расмий учрашувда майдонга тушди. Реал Мадрид ўз баёнотида "тарихимиздаги энг муваффақиятли даврлардан бирида ёрқин ўйин кўрсатган жамоанинг бир қисми бўлган футболчига миннатдорчилик ва меҳримизни билдирамиз" дея таъкидлади. Клуб президенти Флорентино Перез эса: "Реал Мадрид ҳар доим унинг уйи бўлиб қолади", дея қўшимча қилди.
Шанба куни Атлетик Билбао жамоасига қарши кечадиган мавсумдаги сўнгги уй учрашуви олдидан "Бернабеу" стадионида Давид Алаба учун махсус хайрлашув маросими ўтказилади. Шундан сўнг, у Австрия терма жамоаси сардори сифатида АҚШ, Мексика ва Канадада бўлиб ўтадиган Жаҳон чемпионатида иштирок этиш учун йўлга тушади.
