Луис де ла Фуенте: Бу Ламине Ямалнинг вақти
Испания терма жамоаси бош мураббийи Луис де ла Фуенте жароҳатига қарамай, ёш юлдуз Ламине Ямалнинг Жаҳон чемпионатида порлашига ишонч билдирди. 26 кишилик якуний таркибни эълон қилган мураббий, Барселона ҳужумчиси учун ушбу турнир фаолиятидаги бурилиш нуқтаси бўлишини таъкидлади. Ҳозирда тиззасидаги жароҳатдан тикланаётган футболчи жамоанинг асосий умиди бўлиб қолмоқда. Бу ҳақда Goal.com хабар беради.
Европа чемпионлари ўз юришини 15-июн куни Кабо-Вердега қарши ўйин билан бошлайди. Таркибга жароҳатланган Ламине Ямал билан бирга Микел Мерино ҳам киритилган. Де ла Фуенте РТВE телеканалига берган интервюсида: "У жуда ҳаяжонда ва иштиёқи баланд. Ламине ёш бўлишига қарамай, жуда етук футболчи. У бу унинг вақти эканлигини тушуниб турибди. Ҳаётда бундай имкониятларни қўлдан бой бермаслик керак", — деб айтиб ўтди.
Мураббийнинг фикрича, Испания кўплаб позицияларда дунёнинг энг яхши футболчиларига эга ва бу муҳит Ямалнинг ўзини кўрсатиши учун ёрдам беради. Шунингдек, ушбу чақирув тарихий воқеа билан ҳам ёдда қоладиган бўлди: Испания терма жамоасининг Жаҳон чемпионати учун қайдномасида илк бор Реал Мадрид клубининг бирорта ҳам вакили жой олмади. Дани Карвахаль ва бошқа мадридлик футболчилар рўйхатдан ташқарида қолишди.
Тиббий штаб жароҳатланган футболчиларнинг ҳолатини ижобий баҳоламоқда. Де ла Фуенте уларнинг биринчи ўйингача тайёр бўлишига умид қилмоқда, бироқ асосий эътибор узоқроқ масофага қаратилган. Испания "Ҳ" гуруҳида Саудия Арабистони ва Уругвай термаларига қарши ҳам баҳс олиб боради. Амалдаги Европа чемпионлари турнирнинг асосий фаворитларидан бири сифатида кўрилмоқда.
