Криштиану Роналду Португалия сафида 100 ва 101-голларини урди

^{Фото: УЕФА}
Португалия терма жамоаси ҳужумчиси Криштиану Роналду Миллатлар Лигаси 2-тури доирасида Швецияга қарши кечган ўйинда (2:0) дубль муаллифига айланди.

Бу «Ювентус» ҳужумчиси учун терма жамоа сафидаги 100 ва 101-голлар бўлди. Бу борада жаҳон рекорди Эрон терма жамоасининг собиқ ҳужумчиси Али Дайига (109 та гол) тегишли.

Шу тариқа Роналду мазкур рекордни такрорлаши учун Португалия терма жамоасида яна 8 та гол уриши керак.
Криштиану европалик футболчилар орасида биринчи бўлиб юзлик довонни забт этди. Бу борада иккинчи натижа Ференц Пушкашга тегишли — 84 гол.

Бундан ташқари Роналду Португалия терма жамоаси сафида 165-ўйинини ўтказди. Европа рекордигача 11 та, дунё рекордига қадар эса 19 та ўйин қолди.